Projekti Spanjoll

Projekt Pilot

“Mbështetje për implementimin e një programi aktivitetesh dhe masash që të mundësojnë ri-integrimin e të dënuarve me heqje lirie”.

Zbatues teknik i këtij projekti është Agjencia Spanjolle për Bashkëpunim Ndërkombëtar (AEC), për zonën e Mesdheut dhe të Evropës Qendrore.

Qëllimi i Projektit

Qëllimi i këtij projekti është ardhja në ndihmë e Stafeve të Shërbimit të Kujdesit Social dhe atij Juridik, nëpërmjet  asistencës së specializuar të ekspertëve spanjoll z. Julio Fernandez Garcia, ekspert në fushën e së Drejtës Penale dhe Kriminologjisë, si dhe ekspertëve në fushën e Psikologjisë për Sistemin e Vuajtjes së Dënimit.

Objektivat

• Krijimi i bazave për ngritjen në Drejtorinë e Përgjithshme të Burgjeve të një programi aktivitetesh për sistemin e qendrave të kryerjes së dënimit, si për të burgosurit që vuajnë dënimin ashtu dhe për ata që gjenden në paraburgim. 
• Forcimi i mekanizmave që bëjnë të mundur rikthimin në gjirin e shoqërisë të dënuarve/dënuarave me heqje lirie nëpërmjet përpunimit të një Programi të Individualizuar Trajtimi (PIT) për ata ose ato që vuajnë dënimin dhe të një Modeli të Individualizuar Intervenimi (MII) për të paraburgosurit në dy qendra të vuajtjes së dënimit  në Shqipëri. 
• Implementimi i një programi pilot me kurse formimi profesional në dy qendrat e vuajtjes së dënimit ku do të  realizohen programi PIT dhe modeli MII. 
• Implementimi i një programi aktivitetesh terapeutike në dy qendrat e vuajtjes së dënimit ku do të realizohen programi PIT dhe modeli MII.   Me këto dy aktivitete, do të ndikohet në trajtimin si një komponent i përshtatjes në shoqëri. 

Një ndër objektivat afatgjatë është koordinimi i punës për arritjen e një marrëveshjeje me Ministrinë e Punës dhe Çështjeve Sociale për monitorimin e këtij projekti dhe implementimin i tij në të gjithë sistemin penitenciar shqiptar.

Grupi i Synuar

Ky është një projekt pilot dhe si i tillë do të shtrihet në dy institucione penitenciare atë të Fushë-Krujës dhe Vlorës. Grupi i synuar për të përfituar nga ky projekt do të jenë të paraburgosur/të dënuar që vuajnë në këto institucione të cilët do të përfitojnë nga organizimi i aktiviteteve social-edukuese dhe profesionale.

Totali i të dënuarve/të paraburgosurve që do të përfitojnë nga kurset do të jetë respektivisht 90 për Fushë-Krujën dhe 60 për Vlorën.
Një grup tjetër i synuar janë edhe stafet e kujdesit social dhe atij juridik për të rritur aftësitë e tyre profesionale në kuadër të respektimit të drejtave të personave me liri të kufizuar bazuar në konventat ndërkombëtare.

Zbatimi i Projektit

Ekspertët kanë filluar punën me përpilimin e Programeve të Individualizuara të Trajtimit, si raportet psiko-sociale individuale, raportet e ndërhyrjes terapeutike, si dhe asistencë teknike për caktimin e grupeve (të paraburgosurve/dënuarve) që do jenë pjesë e aktiviteteve kulturore, sportive, punëve krijuese apo edhe pjesëmarrësve në  kurset e formimit profesional.

Zbatimi në terren i projektit pilot filloi me:
Vizitat në dy Institucionet e përzgjedhura për këtë projekt pilot në IEVP Fushë-Krujë dhe Vlorë ku ekspertët:    

1. U njohën me infrastrukturën dhe evidentuan ambientet të cilat do të përshtaten në funksion të aktiviteteve që do të organizohen;
2. Diskutuan mbi mundësitë reale të lidhura me infrastrukturën ekzistuese në çdo institucion për realizimin e aktiviteteve të ndryshme me kategori të caktuara të personave me liri te kufizuar.
3. I lanë detyrë stafeve të edukimit për përcaktimin e grupeve dhe listimin e aktiviteteve që janë të mundura për t’u realizuar.

Pjesë e rëndësishme e projektit është edhe nisma  për trajnimin e stafit të Sektorit Social dhe atij Juridik, nismë që synohet të shtrihet në të gjitha institucionet penitenciare. Për të realizuar këtë objektiv në fillim të nëntorit filluan organizimet e seminareve trajnuese në të cilat u trajtuan temat si:

1. Respektimi i të Drejtave të Njeriut në institucionet e vuajtjes së dënimit
2. Trajtimi i të dënuarve konform standardeve të ndërkombëtarizuara
3. Qasja e sistemit spanjoll të burgjeve me atë shqiptar
4. Sistemi i vuajtjes së dënimit. Linja drejtuese dhe parime të përgjithshme të zbatimit të vuajtjes së dënimit 
5. Menaxhimi dhe drejtimi i sistemit të vuajtjes së dënimit
6. Trajtimi si e drejtë themelore për ri-përfshirjen sociale
7. Kontrolli i veprimtarisë së vuajtjes së dënimit
8. Raportet Profesionale të Vlerësimit (RPV) dhe Programet Individuale të Trajtimit (PIT) dhe ato të Ndërhyrjes (PIN) Përmbajtja dhe zhvillimi i Raporteve Profesionale ( juridike, psikologjike, sociale, të sjelljes). Zbatimi praktik i raporteve
9. Përmbajtja dhe zhvillimi i programeve të ndryshme terapeutike, që zhvillohen në mjedisin e vuajtjes së dënimit.

Pas përfundimit të fazës së seminareve, pjesëmarrësve iu lanë disa detyra afatshkurtra që duhet të përmbushnin:

1. Përpilimi i një programi, që do të përmbledhë datat si dhe IEVP ku do të zhvillohen  vizitat
2. Përcaktimi i temave që do të trajtohen, specialistëve dhe ambienteve ku do të zhvillohen seminaret trajnuese të stafit social dhe atij juridik në IEVP të ndryshme
3. Kontakte me Qendrën e Formimit Profesional me objekt marrjen e një informacioni të detajuar mbi kurset profesionale që do të ofrohen në kuadrin e projektit pilot. Ky informacion është i nevojshëm për realizimin e një studimi të nevojave të tregut shqiptar të punës dhe profesioneve  (me synim përcaktimin e kurseve të formimit profesional), asistencë profesionale për realizimin e  kurseve, mundësinë për njohjen e kurseve, brenda Arsimit Profesional si dhe specifikimi i materialeve apo pajisjeve që do të nevojiten për kurset profesionale që do të realizohen.

Objektivat e Arritur

1. Realizimi i asistencës teknike për Drejtorinë e Përgjithshme të Burgjeve për përkufizimin dhe përshkrimin e aktiviteteve të ndryshme dhe grupet e veprimit (të burgosurit) dhe  përcaktimi i aktiviteteve që do të organizohen si dhe hapësirat fizike.
2. Përcaktimi i kurseve formuese dhe profesionale që do zhvillohen

Fushë-Krujë                                                         Vlorë
Kompjuter                                                             Kompjuter
Gjuhë e huaj (anglisht)                                      Mekanik-saldator
Zdrukthëtari                                                          Hidraulik
Hidraulik                                                               Luleshtari
Mekanik-xhenerik
Luleshtari

1. Bashkëpunimi me Ministrinë e Punës dhe Agjencinë Kombëtare të  Arsimimit dhe Formimit Profesional për njohjen e kurseve brenda Arsimit Profesional Shtetëror si dhe  përcaktimin e programeve të  mësimdhënies në kurset e formimit në qendrat e përzgjedhura. Tashmë janë konfirmuar monitoruesit e kurseve profesionale si dhe kurrikulat mësimore.
2. Paraqitja e programit të aktiviteteve para personelit drejtues të qendrave të vuajtjes së dënimit.
3. Hartimi i listave të vlerësimit  të nevojave për aktivitetet dhe kurset profesionale.
4. Realizimi i 14 sesioneve trajnimi ku u trajnuan 136 persona nga Sektori Social dhe 20 nga Sektori Juridik.