Harta e Burgjeve
Instituti i të Miturve Kavajë: Aktivitete të Shumta për të Miturit
Përveç aktiviteteve dhe takimeve me karakter social dhe psikologjik, organizimi i ndeshjeve të futbollit dhe me personalitete të kësaj fushe, kanë qenë prioritare gjatë majit. Siç shprehen vet të rinjtë, aktiviteti më i parapëlqyer është ai i organizimit të aktiviteteve sportive.
Kështu, lojtari i Kombëtares Shqiptare Lorik Cana vizitoi Institutin e të Miturve në Kavajë. Qëllimi i kësaj vizite ishte inkurajimi i të rinjve që vuajnë dënimin në këtë institucion, për adoptimin e një stili jete të shëndetshme dhe se gabimet e së shkuarës nuk duhet të jenë pengim për të ardhmen. Për integrimin në shoqëri të rinjve që janë në konflikt me ligjin është e domosdoshme mbështetja dhe ndihma nga komuniteti. Takime të tilla ofrojnë mundësinë për rehabilitimin e kësaj kategorie dhe rigjenerimin e shpresës për të ardhmen. Pas takimit, u zhvillua një ndeshje sportive me të rinjtë, ku Cana spikati dhe inkurajoi të rinjtë e talentuar në futboll, që të vazhdonin këtë sport edhe në të ardhmen.
Aktivitet tjetër sportiv ishte dhe organizimi i ndeshjes me të rinjtë e Klubit Sportiv “Shkumbini”. Ky aktivitet u zhvillua në një atmosferë të këndshme dhe me shpirt gare, ku të rinjtë e Institutit fituan 4 me 3.
Në kuadër të bashkëpunimit me institucione të ndryshme ndërmjet të cilave, edhe me Shkollën e Mesme të Përgjithshme “Aleksandër Moisiu” Kavajë, u organizua aktivitet kulturor me pjesë teatrale të komedisë \'Pallati 176\'.
Aktivitete të tilla kanë një impakt mjaft pozitiv në edukimin e të rinjve, zhvillimin e shpirtit bashkëpunues në skuadër, krijimin e një klime të punës në grup si dhe spikatjen e talenteve në fusha të ndryshme.
24/05/2010
Foto Galeria
Kerko te denuarit politik
